我呢0的師奶仔, 一年一度0既美食展, 又點會放過, 一於去入貨啦...

我同幾個朋友去, 平時同我去開0個兩個戰友, 由於舊年實在太多人, 買得太多野, 同埋太熱, 所以就放棄左唔去, 不過還有沙陳英陪我去, 去之前我就不停唸好唔好帶車0既, 但係晶佬就唔係好想我帶, 因為可能佢怕我買得太多野, 不過我又覺得擰住咁多野係好重, 所以我最終都係帶左去, 沙陳英仲帶埋行李箱去添...

其實沙陳英個老公一黎到見到個老婆擰左咁大個行李箱黎係好驚訝0既, 不過佢老公實在太唔明白女人0既購物慾係幾咁犀利, 由於我地放工先去, 所以差唔多八點先開始行, 但十點就閂門, 所以得番兩個鐘比我地戰鬥, 本來想買0既野, 好多都買唔到, hall 1 都係行左一半, 所以戰利品唔算好多, 但當然都唔算小啦...

我都係買左一車野, 買左冬菇, 蠔油, 麻油, 急涷食物, 腸, 飲品.....最攪笑買左0的jelly, 同我個名一樣, 叫晶晶, 仲要好好食啦..

近黎我就成日煲湯, 以前晶媽日日都要煲湯, 晶媽0的湯料多個湯, 所以煲出黎0的湯又甜又好味, 但我其實係一0的都唔鐘意飲湯, 嗨, 我呢個晶晶真係身在福中不知福, 由細到大, 晶媽煲0的湯我都唔多飲0既, 晶佬就好鐘意飲湯, 所以晶佬個肚有一半都係0的湯整大0既, 咁近年我中醫就成日話湯水好0岩我飲, 因為我身體唔好, 咁依家冇得飲晶媽靚湯, 我咪煲我0既晶晶靚湯囉...

不過晶媽成日迫我煲水魚湯, 因為我覺得好殘忍, 但晶媽成日話水魚好補好滋陰, 咁佢就會洗好晒之後執埋0的料叫我番屋企煲囉, 所以我依家個雪櫃就全部都係湯料, 隔日煲湯都唔係問題, 但成日煲其實都好貴, 煤氣費都拿利, 因為要0的湯入味, 一定要煲三個鐘以上, 但算啦, 為左身體, 呢0的錢唔慳得啦...